طبيعة صامتة بألوان المية فى مساحة (34* 24 سم) على الرغم انى مش بحب ارسم طبيعه صامته ونادرا يما برسم النوع ده من الرسم ومركز اكتر على البورتريه الا انها من رسوماتى اللى محببه لقلبى وتعبت فيها حاولت على قد مقدر اخليها واقعيه خصوصا الاأضاءه على التفاح ولمعة المعدن بتاع سلة التفاح الحمد لله وفقت فيه بالنسبه للترابيزة والاضائه اللى عليها حصل معايا شوية مشاكل مطلعتش معايا زى ما كانت فى بالى حسيت انها باظت منى خصوصا فى المنظور بالنسبه للظل والنور أعتقد المفروض كان جوه السله يبقى اغمق من كده عشان الظل خصوصا ان الضوء كان نهايته مع التفاحه اللى على الطرف بس حبيت اخليها كده عشان انا بحب الالوان الفاقعه ولقيت شكلها كده حيبقى أجمل ومش مهم الواقعيه...
دى طريقتى فى الرسم بيهمنى الجمال حتى لو كان على حساب الواقعيه او التشابه بالواقع يعنى لو اتحطيت فى موقف للاختيار بين الجمال والواقعيه حختار الجمال لان الجمال مش دايما بيكون فى التشابه مع الحقيقه احيانا الجمال بيكون فى الخيال مش فى الحقيقه.
عموما كانت تجربة ممتعه جدا بالنسبالى وشجعتنى انى اجرب واكرر التجربه وارسم طبيعه صامته تانى على الرغم انى دايما مركز على رسم البورتريهات إلا ان لازم برده الواحد ميحصرش نفسه فى نطاق معين ويجرب طرق وأساليب وأنواع مختلفه من الفن وزى ما قالوا زمان بمناسبة الرسمة دى "لا تضع البيض فى سلة واحده" دى بقى "لا تضع التفاح فى سلة واحدة"
va2
ردحذف