سكتش بألوان الخشب فى مساحة (34*24 سم) لأمير كرارة فى دور نجم الدين من مسلسل الف ليلة وليلة Arabian Nights 2015 الرسمة كانت سكتش على السريع مهتمتش اظهر تفاصيل كتير فيها لانها كانت سكتش سريع هدفه الترفيه كفاصل اثناء العمل على لوحه اخرى كبيرة أحيانا الواحد يما بيكون بيرسم رسمه كبيره وتاخد منه وقت طويل بيبدء يزهق ويتباطئ فى الرسم فبحب انشط نفسى بحاجه على السريع كده تنشط الواحد وتشوقه يرجع يكمل شغل بنشاط أكبر أستخدمت برده كعادتى ألوان خشب Faber-Castel العلبه الحمرا 48 لون بس للأسف حاسس انه طلع مش شبه امير كراره يمكن عشان كنت مستعجل وأنا برسمها أو عشان لون العيون خضرا بزياده بس حاسس أنه بقى شبه بطل لعبه Witcher 3 مش ناقصله بس غير الشعر الابيض ويبقى نسخه منه...
أما بالنسبه للشخصيه دى شخصيه نجم الدين من مسلسل ألف ليله وليله فى رمضان 2015 بالنسبالى كان هو المسلسل الوحيد اللى عجبنى وتابعته وشدنى منذ الاعلان عنه من أكثر من سنه حاجه واحده اللى أصابتنى بأحباط فى المسلسل أنه المسلسل الأول كان المفروض يبقى فيلم وكانوا حيتكلموا عن قصص ألف ليلة وليله نفسها زى اللى فى الكتاب لكن للأسف حصل تسريبات على اليوتيوب لتجهيزاتهم غير الخلافات اللى حصلت بين فريق العمل فاتغير معظمهم والفيلم اتحول لمسلسل والمسلسل بيتكلم عن قصتين بس قصة نجم الدين اللى بيقوم ببطولتها امير كرارة وقصة سعد والسحر الابيض والاسود اللى بيقوم ببطولتها أسر ياسين الشئ المؤسف بالنسبالى أن القصتين مش من كتاب ألف ليلة وليلة مش من التراث هما من خيال مؤالف المسلسل ده شئ ضايقنى جدا لكن على الرغم من كده حيفضل بالنسبالى من أفضل مسلسلات رمضان 2015 ويعتبر دفعه للمنتجين والمخرجين انهم يخرجوا عن اطار الدراما الاجتماعيه المسيطره على معظم المسلسلات المصرية.
ليست هناك تعليقات: