أول تجربة ليا لعمل بورترية بألوان الجواش ل Leonardo Dicaprio فى مساحة ربع فرخ (35*50 سم) حاولت فى الرسمة دى اعمل خلفيه ملونه على غير عادتى دايما مش بعمل خلفيه اما بكون خايف ابوظ الرسمة او بكون مفضلها من غير خلفيه جربت فى الخلفيه تقنيات مختلفه فى التلوين فيها طرطشة وشراران وانفجار لونى احمر من تحت بحيث تبقى الالوان ملعلطه فى الرسمه ومبهجه عشان أنا مش بحب الألوان الباهته بحب الالوان الزاهيه الواضحه الاساسيه بفضلها أكثر الحمد لله راضى عن الرسمه بصوره عامه حصل معايا شوية مشاكل بس فى القميص بتاع ليوناردو دى كابريو فى الناحيه الشمال بس فضلت اسيبها كده من غير تفاصيل كتير فى المكان ده القميص رسمته بمجرد تاتشات بسيطه على عكس الكرافاته بتاعته خليتها واقعيه يمكن هى الحاجه المميزة فى الرسمه دى...
الألوان فى الوجه حسيت انها طلعت معايا افتح من الازم مش عارف مش مرتحلها كده عامله وكانه تمثال من الشمع والشعر برده حصل شوية مشاكل فيه بس عموما بالنسبه لتجربتى الأولى لعمل بورتريه بألوان الجواش الحمد لله واللى جاى حيكون أفضل بإذن الله.
بالنسبه لألوان الجواش عموما هى من الخامات الجميلة فى التلوين يعيبها بس ان لو جه نقطه ميه اثناء الرسم على جزء ملون بيحصل زى البقعه فى الجزء ده وبيبقى لازم تلونه من أول وجديد.
الوان الجواش بتبقى فى البرطمانات اشبه بالعجينه بترسم مباشرة بيها أو بتخفف شويه ولو خففت اوى حتكون زى الوان الميه ولو طلعت جزء من البرطمان وكونته فى الباليته بعد فتره بينشف وبيحجر لو مستمرتش باستمرار تزود نقط ميه عليه وتخلطها او لو سيبته فتره ورجعت تانى للرسمة حتبقى محتاج ميه وسكينه تفتت الحجاره وترجعها تانى عجينه.
غير كمان ان اللى بيتحكم فى درجة اللون مش بس درجة تكوينك للون من عدة الوان مختلفه لا ده كمان كميه الميه اللى مع تجميعه اللون بتفرق فى درجة اللون وده بيبان يما تكوينة اللون بتاعتك تنشف وترجعها تانى عجينه بالسكينه والميه مش بترجع نفس الدرجه الأولانيه.
ليست هناك تعليقات: