سكتش بألوان الخشب لأمير كرارة فى دور نجم الدين من مسلسل الف ليلة وليلة

سكتش بألوان الخشب فى مساحة (34*24 سم) لأمير كرارة فى دور نجم الدين من مسلسل الف ليلة وليلة Arabian Nights 2015 الرسمة كانت سكتش على السريع مهتمتش اظهر تفاصيل كتير فيها لانها كانت سكتش سريع هدفه الترفيه كفاصل اثناء العمل على لوحه اخرى كبيرة أحيانا الواحد يما بيكون بيرسم رسمه كبيره وتاخد منه وقت طويل بيبدء يزهق ويتباطئ فى الرسم فبحب انشط نفسى بحاجه على السريع كده تنشط الواحد وتشوقه يرجع يكمل شغل بنشاط أكبر أستخدمت برده كعادتى ألوان خشب Faber-Castel العلبه الحمرا 48 لون بس للأسف حاسس انه طلع مش شبه امير كراره يمكن عشان كنت مستعجل وأنا برسمها أو عشان لون العيون خضرا بزياده بس حاسس أنه بقى شبه بطل لعبه Witcher 3 مش ناقصله بس غير الشعر الابيض ويبقى نسخه منه...

رسمتى لقطه بألوان الخشب

رسمتى لقطه بألوان الخشب فى مساحة (34*24 سم) حاولت اخلى الرسمة واقعيه واعمل تباين شديد فى الظل والاضاءه فى وش القطه على قد ما اقدر ليضفى شئ من الجمال والواقعيه عليها دى تعتبر اول رسمه ليا لقطه على الرغم حبى لقطط إلا انى مقتنع ان الطابع الافتراسى مغروز فيهم زى الاسود بالظبط لولا بس حجمهم الصغير كانوا اكلونا كلنا لا وحينكروا كمان هما بس عارفين حجمهم كويس وبيبان انهم حلوين ولزاز فالناس اعتبرتهم انهم كائنات اليفه اى أسد وهو صغير زى القطه بالظبط حيلعب معانا ومفيش مشاكل لاكن يما بيكبر وبيشوف حجمه وحجنا بالنسبه ليه وغرايز الافتراس بتظهر عليه ممكن تتغلب عليه فى أى وقت زى حكايه محمد الحلو مدرب الاسود وحكايته مع الاسد صاحبه اللى بيروضه...

بورترية بألوان الجواش ل Leonardo Dicaprio

أول تجربة ليا لعمل بورترية بألوان الجواش ل Leonardo Dicaprio فى مساحة ربع فرخ (35*50 سم) حاولت فى الرسمة دى اعمل خلفيه ملونه على غير عادتى دايما مش بعمل خلفيه اما بكون خايف ابوظ الرسمة او بكون مفضلها من غير خلفيه جربت فى الخلفيه تقنيات مختلفه فى التلوين فيها طرطشة وشراران وانفجار لونى احمر من تحت بحيث تبقى الالوان ملعلطه فى الرسمه ومبهجه عشان أنا مش بحب الألوان الباهته بحب الالوان الزاهيه الواضحه الاساسيه بفضلها أكثر الحمد لله راضى عن الرسمه بصوره عامه حصل معايا شوية مشاكل بس فى القميص بتاع ليوناردو دى كابريو فى الناحيه الشمال بس فضلت اسيبها كده من غير تفاصيل كتير فى المكان ده القميص رسمته بمجرد تاتشات بسيطه على عكس الكرافاته بتاعته خليتها واقعيه يمكن هى الحاجه المميزة فى الرسمه دى...

راقصة أسبانية بألوان الجواش

مش طريقتى فى الرسم بس حبيت أجرب طريقة جديدة بالنسبالى الرسمة منقولة من رسمة للفنان الأسبانى Leonid Afremov أنا غيرت بس فى الخلفية خليت نص ابيض ونص احمر واديها هى اللى بتشق فى الوسط بالنسبه للاسلوب ده فى الرسم للى عاوز يشوف رسومات اكتر بالاسلوب ده يبحث عن رسومات الفنان الاسبانى Leonid Afremov فى جوجل حتلاقوا ابداعات فنيه استخدمت الوان الجواش فيها والرسمة فى مساحة مساحة (24*34 سم) بالنسبه ان الواحد ينقل او يقتبس فكره من رسمه لفنان ويعدل عليها أنا شايف أنه مش عيب طالما مش بنسب الفكره لنفسى وبوضح انها منقوله غير انه النقل بيكون مفيد للدراسه وللتعلم على اساليب الرسم والتلوين المختلفه لفنانين مختلفين وكل ده بيتركز فى زاكرة الفنان وبيفيد بعد كده يما الواحد يحب يرسم حاجه من خياله...

دراسة لعين بشرية زرقاء بألوان الخشب

دراسة لعين بشرية زرقاء بألوان الخشب فى مساحة (31*24 سم) خدت منى حوالى 4 ساعات رسم تعتبر اول دراسه ليا للعين البشريه فى الحجم الكبير ده التجربة كانت ممتعه وإن شاء الله حكررها مرات تانية حاولت اخليها طبيعيه وحقيقيه على قد ما اقدر والحمد لله راضى عن النتيجه حصل بس شوية مشاكل معايا فى رسم الرموش إن شاء الله يما أكرر التجربه تطلع أفضل من كده استخدمت الوان خشب Faber-Castel العلبه الحمرا الرسم عموما بالألوان الخشبيه ممتع وجميل خصوصا للى بيحب الرسم بالرصاص أكيد حيعشق الرسم بالألوان الخشبيه المهم بفكر ارسم رسمه تانيه ضخمه لوجه بنى ادم حجم العين يكون اد العين دى أعتقد حتبقى فرصه جميله لأضافة تفاصيل كتيره بسهوله خصوصا مع المساحه الأكبر من دون برى الاقلام بالبرايه...